આજ મારું વાજીંત્ર કરે ઝમકાર,
તો જેમ રે વાગે ને સાજન મળે રે.
વાગતું વાગતું પોળમાં પેઠું,
તો ઘર રે પૂછે.....તણા રે.
ઉંચલા અવાસ ને નીચલા દરવાજા,
તો મોતી જડયાં તોરણ બારણે રે.
ચોકમાં... પરસાળે નાગરવેલ,
તો ગોરીએ દીવા અજવાળીઆ રે.
સાત દીકરડા તું જણ મોરી ગોરી,
તો જેમ દ્રવ્‍ય ખરચું ને રવ ચડે રે.
એક દીકરડી તું જણ મોરી ગોરી,
તો સાજન જમાડું ઘર આપણે રે.
બાપે માહેરડાંમાં આપી રે બેટી.
તો માડીએ આપી કોટડી રે.
સાતરચું બેનને સાસરે આપો,
તો ભેંશ દોવા ભલી તાંબડી રે.
ચીરના ચંદરવા, જાદરના જલેચા,
તો મછલી બંદરના ચોરસા રે.
બરાનપોરી થાળી વીજાપુરી ઝારી,
તો નવારે નગરના વાડકા રે.
તાબાંના તકિયા, પીતળના આખાળિયા,
તો નવીરે સુકેડનાં પાટલા રે.
એટલું લઈ બેન સાસરે જાજો,
તો લાજ વધારજો આપણી રે.